ධර්මපාලතුමාට එරෙහි වූ බලවේග – 06

ධර්මපාල වාදය සපුරාම අධිරාජ්‍ය විරෝධී, යටත් විජිත විරෝධී, බ්‍රිතාන්‍ය විරෝධී වූවක් විය. ඉංග්‍රීසීන් ප්‍රමුඛ යුරෝපීය ජාතීන් විසින් මෙරටට කරනු ලැබූ අතිමහත් විනාශය ධර්මපාල වාදයේ ප්‍රමුඛ පෙන්වා දීමක් විය. මේ උදාහරණ කීපයකි.

1. ‘සුද්දා සිංහල වර්ගයාගේ සතුරෙක්ය යනු මගේ කල්පනාවයි. මොහු මෙරටට පැමිණුන දින පටන් අප ජාතියට ද අපේ උතුම් නිර්මල ආගමට ද අන්තරාය පැමිණ තිබේ. ලංකාවේ සිංහලයන්ට සුද්දාගේ ප්‍රේමයක් නැත. සිංහලයාට විෂ පොවා සිංහලයාගේ ඉඩම් ටික ගෙනෙ තේ, රබර් වතු වවා ගැනීමට සුද්දා කටයුතු කරයි. සිංහලයා සුරා බී උන්මත්තකයෙකු මෙන් ක්‍රියා කරයි.’

2. ‘රා, අරක්කු, විස්කි, බ්‍රැන්ඩි ආදි මත්පැන් බීමත් හරක් කකුල, හරක් වලිගය, හරක් බඩවැල්, හරක් දිව මේවා කෑමත් මේ මනුෂ්‍යයාගෙන් අඥාන සිහලයා ඉගෙන ගත්තේ ය. හංබංකාර, පරවර, නාට්ටුකොට්ට ආදි පරදේශිකයන් පවා සිංහලයා මෝඩයා කියා නිග්‍රහ කෙරිණ. සුදු පාදිලි රාලලා සිංහල ගොන්තඩියා රවටා ගෙන කුකුල් මස්, තාර මස්, කළුකුන් මස්, ඌරු මස් ඇද බාමින් විස්කි, බ්‍රැන්ඩි පානය කර කල් යවති.’

ධර්මපාලතුමාගේ මේ කර්කශ විවේචනවලදී බ්‍රිතාන්‍යයන් හඳුන්වන ලද්දේ පරසුද්දා යනුවෙනි. බොහෝ ස්වදේශිකයන් ‘හාමුදුරුවනේ’ යැයි කියමින්, බය පක්ෂකම් පෙන්වමින් ගරු නම්බු දී ඉංග්‍රීසීන්ට කතා කළද ධර්මපාලතුමා ඔවුන් දැඩි විවේචනයට ලක් කළේය. මේ විවේචනය නිසා බ්‍රිතාන්‍ය නිලධාරීහු මහත් කෝපයට පත්වූහ. එහෙයින් ඔවුහු ධර්මපාල අන්තවාදියෙකු, රාජ්‍ය ද්‍රෝහියෙකු, ජනයා කුපිත කරන්නෙකු ලෙස සැලකූහ. පරසුද්දා යනුවෙන් කරන ලද ප්‍රකාශ සම්බන්ධයෙන් ප්‍රශ්න කළහ. එබඳු එක් අවස්ථාවක් එතුමා සිය ලේඛනවල සඳහන් කර තිබේ.

‘මෙයට වර්ෂ හයකට ප්‍රථම මම අනුරාධපුරයෙහි සිටි කාලයේ දේශනා කරන්ට බෝ මළුවට සැන්ඳෑ කාලයේ යෑම කෙළෙමි. දේශනාවේ දී සුද්දා විසින් සිංහලයන්ට කරනු ලැබ තිබෙන ක්‍රියා මේ මේවා යයි මම පෙන්නා දුනිමි. මගේ කථාව අසන්ට ජා සරියන් කෙනෙක් පැමිණ මෙසේ කතා කෙළේ යයි අනුරාධපුරේ පොලිස් නඩුකාර තැනට ගොසින් පැමිණිලි කෙළේ ය. බ්‍රෙන් නම් සුදු මහතා මට එන්ට කියා ලියමනක් එවූ බැවින් උන්නැහේ දකින්ට මම ගියෙමි. උන්නැහේ මට කථා කොට ඉංග්‍රීසීන්ට බණින්නේ මන්ද? කියා මගෙන් ඇසූ විට මම කිසි කෙනෙකුට බණින කෙනෙක් නොවෙමි. මවිසින් කරනු ලබන දේශනාවල දී පරසුද්දා කියනවා හැර වෙන බැණීමක් නැතැ යි කී විට එසේ ය ඒ වචනය බැණීමක් යයි කිවේ ය. මම එවිට උන්නැහේට පරසුද්දා කියන්නේ මේ නිසා යැයි උත්තර දුන්නෙමි. පර යන්නෙහි තේරුම ඉංග්‍රීසියෙන් ‘ෆොරෙන්’ යනු යි. ඒ සිංහලට පිට, පරදේශ, පිටරට, පර වාද, පර තෙර යනු යි. සුද්දා කියන්නේ කළු, නිල්, පච්චවර්ණ නොවන නිසාත් මෙරට නොවන නිසාත් ය. පරසුද්දා යන වචනය ව්‍යවහාර කිරීම භාෂා රීතියට එකතු ය යි මම බ්‍රෙන් උන්නැහේට කීවෙමි.’

මෙබඳු සිදුවීම් සිදු වුවත්, තමන් ඉංග්‍රීසින්ගේ සැකයට භාජන වුවත් ධර්මපාලතුමා ඉංග්‍රීසීන්ට එරෙහි සිය චණ්ඩ වාග් ප්‍රහාරය වෙනස් කළ බවක් නොපෙනේ. අඛණ්ඩව ආක්‍රමණකාරී විවේචන පළ කරමින් ඔහු රටපුරා සැරිසැරූ බව පෙනේ. එබඳු අවස්ථාවක සිදු වූ තවත් සිදුවීමක් ඔහු මෙසේ සටහන් කර තබා තිබේ.

‘සුද්දාගේ හපන්කම තුවක්කුව නිසයි. දත් නැති රිලව් කොටසක් මෙන් සිටින සිංහලයන් රවටා ගෙන සිටියි. සුද්දාගේ ආහාර, බීම, චාරිත්‍ර වහාම ප්‍රතික්ෂේප කරන්ට සිංහලයන්ගෙන් ඉල්ලමි. ප්‍රයෝජන ශිල්ප කරන්ට සිංහලයන්ගෙන් ඉල්ලමි. ප්‍රයෝජන ශිල්ප කර්මාන්ත කිසි ශාස්ත්‍රයක් සිංහලයන්ට සුද්දා උගන්වන්නේ නැත. සීදුවට කිට්ටු රත්දොලුව නම් ගමේ මා කළ දේශනාවේ දී බැන්නා යයි මැන්දිස් නමින් කෙනෙක් ‘ඔබ්සවර්’ පත්‍රයට ලියා යවා තිබුණා දුටුවෙමි. පරසුද්දා යන වචනාර්ථය ‘ෆෙරින් ඩෙවල්’ යයි මේ මනුෂ්‍යයා තේරුම් කර සුද්දන් මුළා කරවීමට බොරු හෑල්ලක් නියා තිබුණි. ‘ෆොරින් ඩෙවල්’ වචනාර්ථය ‘පරයකා’ කියා වේ. පරසුද්දා ඉංග්‍රීසියට ‘ෆොරින් වයිට්’ කියා වේ. පර – ෆොරින්, සුද්දා – වයිට්. ක්‍රිස්තියානිකාර මැන්දිස් ව්‍යවහාර කර තිබෙන්නේ ෆොරින් ඩෙවල් කියා ය. ෆොරින් – පර, ඩෙවල් – යකා. එවිට ‘පරයකා’ යනු යි. පරසුද්දා යන ව්‍යවහාරයට වඩා පරයක්ෂයා නොහොත් පරයකා කියා ව්‍යවහාර කිරීම මැන්දිස් විසින් කර තිබේ. මනුෂ්‍යයන් මුළා කරවන මේ පුද්ගලයා ‘කාලකණ්ණි පව්කාර’ කොටසට අයිති කෙනෙකු බව මෙයින් හැඟී යයි.’

මේ යුගයේ ම ජීවත් වූ ජෝන් කොතලාවල (1865 – 1908) ඉංග්‍රීසීන්ට නිර්භයව මුහුණ දුන් බලසම්පන්න නායකයෙකි. ශාරීරිකව ශක්තියෙන් යුත් පොලිස් නිලධාරියකු වූ ඔහු අවස්ථා ගණනාවකදීම සුදු ජාතිකයන්ට පහර දුන්නේය. මේ වීර වික්‍රමාන්විත ක්‍රියා ගැන ඇසූ අනගාරික ධර්මපාල ‘අපගේ නිර්භීත ජෝන් කොතලාවලගේ ආදර්ශය අනුගමනය කරමින් සුද්දන්ට තඩි බාන මෙන්’ සිංහල ජනයාට කියා සිටින්ට වූයේය. ජෝන් කොතලාවල ධර්මපාලතුමාගේ සමීපතමයෙකු වූ අතර, වලිසිංහ හරිස්චන්ද්‍ර සහ මාටිනස් පෙරේරා සමඟ අමද්‍යප ව්‍යාපාරයේ ක්‍රියාශීලීව කටයුතු කළ අයෙකි.

අනගාරික ධර්මපාලගේ උද්වේගකර දේශප්‍රේමයේ අභාසය ලැබූ තවත් නායකයෙකු වූයේ කම්කරු නායක ඒ. ඊ. ගුණසිංහ යි. ඒ. ඊ. ගුණසිංහ කෙරෙහි ධර්මපාල වාදයේ බලපෑම පිළිබඳ ආචාර්ය කුමාරි ජයවර්ධන කර ඇති සඳහන් කිරීමක් මෙසේ වේ.

‘ගුණසිංහ කෙරෙහි වූ ඉතා වැදගත් බලපෑමක් වූයේ, අනගාරික ධර්මපාල විසින් කර ගෙන යන ලද සටනින් සැපයුණු ආදර්ශයයි. 1912 කාලයේ දී අමද්‍යප ව්‍යාපාරයේ බොහෝ ක්‍රියාශීලී වූ ධර්මපාල, අධ්‍යාපනය, පත්‍ර කලාව සහ ඔහු විසින් ආරම්භ කරන ලද නිදහස් ආයුර්වේද බෙහෙත් ශාලාව සඳහාද, තම කාලය යෙදෙව්වේය. ධර්මපාල සමඟ නිතර සාකච්ඡා කළ තරුණ ගුණසිංහ, ඔහුගේ පුස්තකාලයෙන් පොත් ඉල්වා ගත්තේය.’

ධර්මපාල දර්ශනය අන්‍ය සකලවිධ ජාතීන්ට විරුද්ධ, අන්‍ය සකලවිධ ජාතීන් ප්‍රතික්ෂේප කළ දෘෂ්ටියක් බවත් ඇතැම්හු ප්‍රකාශ කරති. එහෙත් වඩා සාවධානව සලකා බලන විට පෙනී යන්නේ ධර්මපාල සකලවිධ ජාතීන්ගේ විශිෂ්ටතා අගය කළ බවයි. සකලවිධ ජාතීන්ගේ විශිෂ්ටතා ආදර්ශයට ගන්නා මෙන් සිංහල වර්ගයාට අණ දෙමින් ප්‍රකාශ කර සිටි බවයි. මේ ‘දැනගත යුතු කරුණු’ ලිපිවලින් උපුටා ගත් උදාහරණ කීපයකි.

1. මරක්කල ජාතිකයන් විසින් ස්වකීය සන්ථාගාරවලදී සම්මුඛව දිනපතාම සමගියෙන් සාකච්ඡා කරනු ලැබේ. ඔව්හු දවසට පස්වාරයක් ස්වකීය ආගමට ප්‍රේමයෙන් කුල චාරිත්‍රවලට අනුව ක්‍රියා කෙරෙති. මරක්කලයාගේ හොඳ ගති රාශියක් තිබේ. රික්ෂෝ රථය අදින දෙමළා පාන්දර නැගිට ඇඟපත සෝදාගෙන පිරිසිදු වස්ත්‍රයක් ඇඳ නළලේ අළු ටික ගාගෙන වැඩ පටන් ගනී. ලංකාවේ අනිකුත් සියලු ජාතිවලම මනුෂ්‍ය වර්ගයා ඔවුනොවුන්ගේ කුල ධර්මවලට අනුව ක්‍රියා කෙරෙති. අහෝ! කාලකණ්ණි අන්ද බාල සිංහලයෝ පමණක් උම්මත්තකයින් මෙන්ද, ‘ඇට්හොම්’, ‘හොනිමූනි’ පවත්වමින් කේක් ෂැම්පිං, ගවුම්, බ්‍රොස්තෙක්ක, බම්බුසාය, පිදුරු තොප්පි, මෝර්නින් කෝට්, ඩ්‍රස්සූට්, ටුවිඩ්කැප් ආදිය පාවිච්චියට ගනිමින් අත තිබෙන ධනය නැතිකර ගෙන සුද්දාට දාසකම් කරමින් කල් යවති.

2. ලංකාවේ හම්බ, මරක්කල, දෙමළ, බොම්බයිකාර, ලන්සි, පාරසී සමූහයා දක්නා ලැබේ. ජාතික වස්ත්‍ර, ජාතික නාම, ජාතික චාරිත්‍ර උල්ලංඝනය නොකොට යටකී ජාතීහු පවත්වත්. කිසි චාරිත්‍රයක්, ආගමක් ධර්මයක්, ආචාර්යවරයෙක් නැත්තේ කාලකණ්ණි සිංහලයන්ට පමණයි.

3. ධන සැපයීමට සිංහලයාට මොළේ නැතැයි කොච්චි දෙමළ කුලීකාරයන්ට වැටහී තිබේ. රික්ෂෝ රථය අදින දෙමළ කුලීකාරයාට තිබෙන ඥානය සිංහල කාලකණ්ණියාට නැත. කලිසම්, කෝට්, තොප්පි, ටයි, කොලර්, කමිස, මේස්, බැනියන්, සපත්තු, මේස්, ලේන්සු, බොත්තන් ආදියට සිංහල මෝඩයා කරන නිරර්ථක වියදම් අනික් ජාතීහු කරන්නේ නැත.

4. දෙමළ, මරක්කල, ලංසි, හෙට්ටි, ඉන්දියන්වරු, හම්බයෝ, කොච්චි, යුරෝපීයවරු ද ශතවර්ෂ හතළිහ තුළ වෘද්ධියට පැමිණියෝ ය. කළුහම ඇති ජාතීහු ලංකාවේ සිටිති. ඔවුන් ඉංග්‍රීසීන්ගේ චාරිත්‍ර ගන්නේ නැත. සිංහල මෝඩයා පමණක් ඉංග්‍රීසි චාරිත්‍ර ගෙණ පිරිහීමට පත් විය. දෙමළ, කොච්චි, හම්බ, මරක්කල කළු වර්ගයා දවසින් දවස වර්ෂ තිහක් තුළ සමෘද්ධි භාවයට පැමිණියාහු යි. කාලකණ්ණි සිංහලයෝ විනාශමුඛයට පත් වූවෝ ය.

ගුණදාස අමරසේකර සිය ‘අනගාරික ධර්මපාල මාක්ස්වාදී ද?’ කෘතියෙහිදී ධර්මපාලතුමාගේ මේ ධර්මෝන්මාදි, ජාතිකෝන්මාදි ස්වරූපය පිළිබඳ වැදගත් අදහසක් පළ කර තිබේ. අමරසේකර කියා සිටින්නේ එකී ආවේගකාරී බව ප්‍රතිමල්ලවයන් මැඬීමත්, ස්වදේශිකයන් කුල්මත් කිරීමත් අරමුණු කර ගත් බවයි.

‘ධර්මපාලතුමාගේ ලිපි ලේඛන අවිචාරයෙන් කියවන්නෙකුට ඔහු ධර්මෝන්මාදයෙන් පෙළුණු පිස්සෙකු ලෙස හැඟීම පුදුමයක් නොවේ. එහෙත් අප විසින් මතක තබා ගත යුත්තේ ඒ උන්මාදය ධර්මපාලතුමා විසින් හිතාමතා ඕනෑකමින් ඇති කර ගත්තක් බවයි. බොහෝ නූගත් ගැමියන් එකල ක්‍රිස්තියානි පූජකවරුන් විසින් සිය ආගමට හරවා ගන්නා ලද්දේ ඔවුන් ගස්වලට වඳින වැදි පිරිසක් බව පෙන්වා දෙමිනි. ඔවුන්ට උතුම් ආගමක් ලබා දෙන බව අඟවමිනි. එවැනි අවස්ථාවක දී ප්‍රති මල්ලවයන් මැඩීම සඳහා මෙවැනි මඟක් හැර ගත යුතු අන් කවර මඟක් ද? ධර්මපාලතුමා දේශපාලනඥයකුට සුදුසු කූට තන්වැසි බුද්ධිය තිබුණ එකෙකු බව ඔහුගේ මුළු ක්‍රියා කලාපයෙන් ම මොනවට හෙළි වෙයි. ඔහු විසින් නොයෙක් වර ප්‍රදර්ශනය කරන ලද මේ ජාතිකෝන්මාදය, ධර්මෝන්මාදය, අභීත සිංහ විලාසය ඔහු විසින් ඒ කූට බුද්ධිය ඇසුරෙන් ආරූඪ කර ගත්තකි.’

අනගාරික ධර්මපාල ස්වෝත්තම වාදියෙකැයි, අන්ත ජාතිකවාදියෙකැයි වර්ගවාදියෙකැයි බොහෝ අවස්ථාවල කියැවී තිබේ. එහෙත් ඔහු ස්වකීය සිංහල ජන වර්ගයා ප්‍රකෝපකාරී ලෙස විවේචනය කළ පුද්ගලයෙකි. කසයෙන් තළන්නාක් බඳු වූද, පොරෝ පහර වැනි වූද එකී විවේචන සිංහල ජනයාගේ සකලවිධ සංකර චර්යාවන් හා අනර්ථකාරී ක්‍රියාදාමයන්ද පතුරු ගසයි.

1. ‘කිසි කුලාචාර ගෝත්‍ර ධර්මයක් ශිල්පයක් වත් පිළිවෙතක් නැත්තේ සිංහල බුද්ධාගම් කාරයාට පමණයි. සිංහල බුද්ධාගම්කාරයා කිසි ගුරු ආශ්‍රයක් නැතුව ආදෘශයක් නැතුව ශිල්ප කර්මාන්තයක් නොදැන කුල පරම්පරා ධර්මයක් නැතුව අහසින් වැටුණ සතෙකු මෙන් අන්‍ය ජාතීන් කරන, කියන දේ කරමින් ගූථභක්ත සංඛ්‍යාවට අයිති ග්‍රාම සූකරයන් මෙන් යුරෝපීය කාම සැපයට පමණක් ආසාවෙන් අත තිබෙන ධනය අනර්ථදායක අන්දමට වියදම් කොට දෙලොවටම ප්‍රයෝජන නැතුව තිරිසනෙකු මෙන් මැරී යන්නේ ය. ක්‍රිස්තියානි ගුරුවරයන් යටතේ ඉගෙන ගනු ලබන සිංහල දරුවන් වැඩි විය පැමිණුනාම යුරෝපීය චාරිත්‍ර භාවිතා කරනු ලැබේ. විකාර හැඩ ඇති ගවුන්, සාය, බටකොළ තොප්පි, අඟල් දෙකක් උස් විලුම් ඇති සපත්තු, ඉන කුඩා කිරීමට සාදා තිබෙන බොස්ත්‍රෙක්, පිදුරු තොප්පි, ටයි, කොලර්, කෝට්, කලිසම් අඳින පූර්වදිග වර්ගයක් සිංහල මෝඩයන් හැර වෙන ජාතියක් නැත. වාල් කමෙන් හැදෙන කාබේරි ජාතිය පමණක් සිංහලයන් මෙන් යුරෝපීය නම් ගම් චාරිත්‍රාදිය ගනු ලැබේ.’

2. ‘අපේ සිංහල අඥානයෝ සුද්ධාගේ කලිසම් කෝට් හැඳගෙන, සුද්දාගේ තොප්පි හිසලාගෙන සුද්දාගේ වසල චාරිත්‍ර ගෙන අන්තරායයට යෙති. අහෝ! කවදා සිංහලයාට ප්‍රඥාචක්ෂුය ලැබේ ද? බක ජාතකයේ පෙනෙන කොකාට රැවටී තටාකයේ සිටි මත්ස්‍ය රැළ ජීවිතයක්ෂයට පැමිණියෝ ය. එමෙන් ම සුද්දාට රැවටී මත්පැන් බොමින්, කලිසම්, තොප්පි, ගවුම්, බොස්ත්‍රෙක්ක අඳිමින් සුද්දාගේ අඩි දොළහක් උස ඇති කේක් ගෙඩි කමින් සිටියොත් සිංහල පරම්පරාව නැති වන්නේ ය.’

අනගාරික ධර්මපාල මෙරට ධනපති පන්තියට අයත් නායයෙකු බව ඇතැමුන්ගේ කල්පනාවයි. එහෙත් ධර්මපාල ධනපති පන්තිය දැඩි සේ විවේචනයට බඳුන් කළ බව පෙනේ. ඔවුන් අඩක් ඉංග්‍රීසිමය වූද නොගැඹුරු අධ්‍යාපනයක් ලත් ආත්මාර්ථකාමී පිරිසක් බව ධර්මපාලගේ විවේචනය විය. ධර්මපාල පැහැදිලි වශයෙන්ම ඉදිරිපත් කළේ ධනපති පන්තියේ වඩා නවීනකාරී කොටස්වල මතය බව ආචාර්ය කුමාරි ජයවර්ධනගේ අදහසයි. සිය රටේ ධනය උපයා ගත් ස්වදේශික ධනවතුන් ඒවා විජාතික සිරිත් විරිත් උදෙසා වියදම් කිරීම ඔහු කර්කශ ලෙස විවේචනය කළේය. මේ එක් උදාහරණයකි.

‘අපේ සිංහල ධනවතුන් පළමු කොට කරන්නේ සුද්දාගේ තොප්පිය හිසට දැමීමයි. ගෙයක් කරවා ඊට සුද්දාගේ රටේ තිබෙන ගමක නමක් දීමයි. පුතාට හැමිල්ටන්, ආර්කිලෙස්, ඇල්ජින්ස්ටන්, ඩන්කන්, ඔස්බර්න් යන නම් රාශියක් ඒකාබද්ධ කොට පෙරේරා, සිල්වා, ප්‍රනාන්දු, දියස්, පීරිස් ආදී ප්‍රංගි නම්වලට යාකර ගැනීමයි. ධනවතාගේ පුතා කලිසම්, තොප්පි, කෝට්, ටයි, කොලර්, කමිස, සපත්තු ඇඳගෙද කටේ සිගරට් එක තබාගෙන දුම් පිට කරමින් වේගයෙන් දුවන අශ්වයෙක් රෝද දෙකේ රථයකට බැඳ කොල්ලුපිටියේ ගෝල්ෆේස් පාරේ එලවාගෙන යාමයි. ශාස්ත්‍රාදිය කිසිත් නූගත් මව්පිය දෙදෙනා පුරාණ චාරිත්‍රාදිය පැවැත්වූ නුමුත් ආර්කිලෙස්, හැමිල්ටන්, මල්කි, සෙදෙක් පුත්‍රයා සහ මැටිල්ඩා, ග්‍රෙස්, ලිලියන් ගර්ටියුඩ් නම් දුව පුරාණ කුලධර්මය ප්‍රතික්ෂේප කොට යුරෝපීය චාරිත්‍රානුකූලව ගමන් කරති.’

(සමුද්‍ර වෙත්තසිංහ මහතාගේ ‘දැදුරු කළ සියපත’ ග්‍රන්ථයෙනි)

Advertisements
This entry was posted in Uncategorized and tagged , . Bookmark the permalink.

One Response to ධර්මපාලතුමාට එරෙහි වූ බලවේග – 06

  1. කසුන් පවසයි:

    ඔබට බොහොමත්ම පින් සිදු වේවා !!! අප නැවත ධර්මපාල යුගයක් බිහි කලයුතු අවධියක ඒ වෙනුවෙන් හඬ නගන ඔබ වැන්නන් මා උපන් දේශයට සම්පතකි…. තෙරුවන් සරණයි.. ජයෙන් ජය ශ්‍රී….

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )